ජාතික තරුණ සංගමයේ සාමාජිකයින්ට පාර්ලිමේන්තුවේදී විශේෂ වැඩසටහනක්

ජාත්‍යන්තර තරුණ දිනය සැමරීම වෙනුවෙන් ලබන 19 වැනිදා ජාතික තරුණ සේවා සභාවේ පත්වීමට නියමිත ජාතික තරුණ සංගමයේ සාමාජික සාමාජිකාවන්ට පාර්ලිමේන්තුවට ආරාධනාකොට ඔවුන් සමග විශේෂ වැඩසටහනක් පාර්ලිමේන්තුවේදී පැවැත්වීමට තාරුණ්‍ය සඳහා වන පාර්ලිමේන්තු සංසදය විසින් තීරණය කර ඇත.

ඒ තරුණ කටයුතු නියෝජ්‍ය අමාත්‍ය එරංග ගුණසේකර මහතාගේ සභාපතිත්වයෙන් එම සංසදය පසුගියදා (06) පාර්ලිමේන්තුවේදී රැස්වූ අවස්ථාවේදීය.

මෙහිදී අදහස් දැක්වූ සංසදයේ සභාපතිවරයා ජාතික තරුණ සේවා සභාවේ ජාතික තරුණ සංගමය සඳහා සාමාජිකයින් පවතන්නේ වසර 30ට පසුව වීම විශේෂත්වයක් බව පෙන්වා දුන්නේය. ඒ හේතුවෙන් 2025 අගෝස්තු 12 වන දිනට යෙදෙන ජාත්‍යන්තර තරුණ දිනය සැමරීමට මෙලෙස ජාතික තරුණ සේවා සභාවේ තේරීපත්වන එම ජාතික තරුණ සංගමයේ සාමාජිකයින්ට විශේෂ පිළිගැනීමක් ලබාදීම වෙනුවෙන් මෙම වැඩසටහන සංවිධාන කරන බව පැවසුවේය.

තවද මෙහිදී තාරුණ්‍ය සඳහා වන පාර්ලිමේන්තු සංසදයට අන්තර් ජාතික වශයෙන් ද සහයෝගයෙන් වැඩකටයුතු සිදුකල හැකි අවස්ථාවන් පිළිබඳවද සාමාජික මන්ත්‍රීවරයන් දැනුවත් කිරීම සිදුවිය. එමෙන්ම තාරුණ්‍ය සඳහා වන පාර්ලිමේන්තු සංසදයේ දැක්ම සහ මෙහෙවර පාඨ සකස් කිරීම උදෙසා විශේෂ කමිටුවක් සංසදයේ සාමාජිකන්ගෙන් පත් කර ගන්නා ලදී.

මේ අවස්ථාවට සංසදයේ නියෝජ්‍ය සම සභාපතිවරුන් වන ලසිත් භාෂණ ගමගේ, තනුර දිසානායක, නීතිඥ හසාරා ලියනගේ යන ගරු පාර්ලිමේන්තු මන්ත්‍රීවරයන්ද ඇතුළුව සාමාජික ගරු පාර්ලිමේන්තු මන්ත්‍රීවරයන් පිරිසක් සහභාගී වූහ.