තීරු බදු අඩු කර ගැනීමේ දී අමෙරිකාව සමග කිසිදු ගිවිසුමකට ශ්‍රී ලංකාව අත්සන් කර නැහැ

අමෙරිකාව සහ ශ්‍රී ලංකාව අතර වෙළෙඳ පරතරයේ ස්භාවය අනුව අනෝන්‍ය තීරු බදු පැනවීමක් සිදු වූවා මිස රටේ අභ්‍යන්තර ගැටලුවක් මත එය සිදු වූවක් නොවන බව ජනාධිපති අනුර කුමාර දිසානායක මහතා පවසයි.

ජනාධිපති අනුර කුමාර දිසානායක මහතා පාර්ලිමේන්තුවේ දී අද(07) විශේෂ ප්‍රකාශයක් සිදු කරමින් මේ බව කියා සිටියේය.

අමෙරිකාව සමඟ මෙම තීරු බදු සම්බන්ධයෙන් සාකච්ඡා කරන්න රජය පැත්තෙන් ප්‍රභල කණ්ඩායමක් ඉදිරිපත් කළ බව පැවසූ ජනාධිපතිවරයා ඒ අනුව මුදල් අමාත්‍යංශ ලේකම් හර්ෂණ සූරියප්පෙරුම, මහබැංකු අධිපති, වෙළෙඳ අමාත්‍යංශයේ ලේකම්, ජනාධිපති ආර්ථික කටයුතු උපදේශක දුමින්ද හුලංගමුවත් එක්සත් ජනපද ශ්‍රී ලංකා තානාපති මහින්ද සමරසිංහ මහතා මෙහි සම්බන්ධීකරණ කටයුතු සිදු කරමින් විශාල කාර්යභායක් සිදු කළ බව කියා සිටියේය.

මේ සම්බන්ධයෙන් සිදු කෙරෙන සාකච්ඡා පියවරයෙන් පියවර මාධ්‍ය සාකච්ඡා පවත්වමින් සන්දර්ශණ දැමීමට රජයට අවශ්‍යතාවක් නොතිබුණු බව ද අනුර කුමාර දිසානායක මහතා සඳහන් කළේය. අමෙරිකාව විසින් ඉදිරිපත් කළ ඇතැම් යෝජනා පිළිබඳ රජය සාකච්ඡා මට්ටමන් සිටින බවත් රජය මේවන තෙක් කිසිදු අවසන් එකඟතාවකට පැමිණ ගිවිසුමක් අත්සන් කර නොමැති බව ජනාධිපතිවරයා අවධාරණය කරනු ලැබීය.

සිදු කළ සාකච්ඡාවල ප්‍රතිඵලයක් ලෙසින් සියයට 44 සිට සියයට 20 දක්වා තීරු බදු අඩු කර ගැනීමට හැකිවීම සම්බන්ධයෙන් එක්සත් ජනපදයට ස්තූතිවන්ත වන බවද කී ජනාධිපතිවරයා, එසේම මේ සම්බන්ධව බලපාන කර්මාන්තකරුවන්, ව්‍යවසායකයින් සියලු දෙනා සමඟ නිරන්තරයෙන් සාකච්ඡා කර ඔවුන්ට බලපාන දෑ පිළිබඳ අවබෝධයකින් යුතුව මේ කටයුතු සිදු කළ බවයි.

තවමත් සියයට 20 ප්‍රතිශතය අඩු කර ගත හැකිද යන්න සම්බන්ධයෙන් සාකච්ඡා පවත්වමින් සිටින බව ජනාධිපතිවරයා වැඩිදුරටත් පැවසීය.