Formula 3 - යෙවාන් ඩේවිඩ්

ජාත්‍යන්තර මෝටර් රථ සම්මේලනය (FIA) විසින් සංවිධානය කරන ෆෝමියුලා ධාවන තරගාවලියක Formula 3 අදියර නියෝජනය කිරීමට සුදුසුකම් ලබාගත් පළමු ශ්‍රී ලාංකික ධාවකයා බවට පත්වීමට යෙවාන් ඩේවිඩ් සමත් වී තිබෙනවා.

ඒ අනුව, 2026 තරග වාරය සඳහා Formula 3 තරග සඳහා AIX ධාවන කණ්ඩායම සමග ඔහු ගිවිසුම්ගත වී ඇති බවයි සඳහන් වන්නේ.

18 හැවිරිදි යෙවාන් ඩේවිඩ් මේ වනවිට යුරෝ ෆෝමියුලා විවෘත ශූරතාවලියට තරග වදින අතර, එහිදී මේ දක්වා ජයග්‍රහණ හතරක ලබාගෙන තිබෙනවා.

එමෙන්ම ඔහු 2024 දී යුරෝකප්-3, ස්පාඤ්ඤ F4 සහ UAE F4 ශූරතාවලි සඳහාද තරග වැදුනා.

තම රටෙන් මෙම ශූරතාවලියට තරඟ කරන පළමු ධාවකයා වීම ගැන ආඩම්බර වන බවත්, මෙම අවස්ථාව ලැබීම ගැන කෘතඥ වන බවත් AIX ධාවන කණ්ඩායම සමඟ අත්සන් කිරීම ගැන සඳහන් කරමින් යෙවාන් ඩේවිඩ් පවසා සිටියා.